Blog

மலர்கள் மணம்வீச மகிழ்ச்சிப் பெருக்கெடுக்க
வசந்தருது வருகையிலே வருகின்றான் மாரனுமே.
வெண்ணிலவு குடைபிடிக்கத் தென்றலெனும் தேரேறி
கரும்புவில் கையேந்தி மலர்க்கணைகள் எய்திடவே

இசைந்ததொரு வசந்தத்தில் வருகின்றான் மதனுமே
இயற்கையெழில் எல்லாமெங்கும் இங்கிதமாய் இருக்கையிலே
முனிவரையும் மனம்மயக்கும் இளவேனிற் தோற்றத்திலே
கன்னியர் நினைவினிலும் கல்யாணக் கனவுகள் உருவாக்கும்,

எண்ணங்கள் துளிர்த்திட இனியஉலா வரும் காமனே
சற்றே நில்! நான் உரைத்திடும் உண்மை கேள்.
சீதைதனை மணமுடிக்கச் சீராகச் ஸ்ரீஇராமன்
அயோத்தியிலே வில்லொடித்தான் அழகாக அன்று.

மங்கையர் மனதினில் காதல் கணைதனை எய்துவிட்டு
வரதட்சணை வில்தனை வளைத்தொடிக்க முடியாது
காதல்செய்த நாயகர்கள் கையாலாகாதவர்களாய் இன்று.
ஆறறிவுடைய உயர்திணையான நம்மானிட இனத்தினிலே

ஆணினம் தாம் மணமுடிக்க நேசங்கொண்ட பெண்வீட்டில்
அணிகலன்,வீடு, ரொக்கமென அதிகமாய்க் கேட்பதனால்
தரமுடியா நிலையாலே தம் கல்யாணக் கனவுகள்
தரைமட்டமாகிடுமோ எனக்கன்னியரும் கலங்கிநின்றார்.

பூக்களெல்லாம் தேன் சொரியும் வசந்தகாலப் பொழுதினிலே
இளம்பூவையர் கண்களில் நீர்ப்பூக்கள் இனிவேண்டாம்.
நற்றவம் புரிந்த நம்மிறை சிவனாரின் தவம்கலைக்க
மலரம்பு எய்தி நின்ற மாரனே மனங்களை வருத்தி

மாறாதத் துயரூட்டும் வரதட்சணைக் கொடுமைதனை உன்
கூரம்புகள் எய்தே குவலயத்தில் அழித்துவிடு.
காதல் தவமியற்றும் கன்னியரின் மனங்களிக்க
மலரம்புகள் எய்யும்முன்னே மறுமலர்ச்சி அம்புகளை எய்துவிடு
புரட்சி அம்புகளை எய்துவிடு…!

மண்ணிலே விதையிட்டு கண்போலக் காத்திருந்து,
எண்ணியது நிறைவேற இதழ்விரிக்கும் மலர்கள்,
வண்ணங்கள் கண்டு மனங்களது மலர்ந்தாலும்,
மண்மீது வாடிவதங்கி  சருகாகும் நிலையெண்ணியே,

புண்ணாகும் இதயமது ஏக்கத்தால் வலியெடுக்கும்.
புண்ணியம் செய்தாலும் பூக்களது நிலைக்காதென்றாலும்,
கொண்ட நறுமணமோ கூடவே நினைவில்வரும்.
அண்டிவரும் அந்திவேளை அஸ்தமனங்கள் எல்லாம்

மீண்டும் நல்லதொரு விடியலுக்கு வேளைதரும்.
மண்ணில் வேரடியில் வீழ்ந்துமலர்கள் சருகானாலும்,
திண்ணமாய் மீண்டும் மலர்மலர எருவாகும்.
கண்டு மனம்மகிழ உறுதுணையாய் உரமூட்டும்
மலர்கள் மலர்வதெல்லாம் மீண்டும் மலர்வதற்கே…

காலுக்குள் இடறிய சிறுகல்லதனைத் தானெடுத்துக்
கண்ணருகே நீபிடித்துக் கண்ணையது மறைக்குதென
கண்ணீரைத்தான் சொரிந்தே கவல்வதால் என்னபயன்?
கையதனைத் தான்நீட்டி கல்லதனைத் தூரவைத்தே

காணும் வேளையிலே, கல்லதனைச் சிறியதாய்க்
கண்களது கலக்கமின்றிக் காட்சி கொள்ளும்
கனத்த மனம் காற்றெனவே இலேசாகும்.
வாழ்வினில் வந்தெதிர்க்கும் இடர் களைய

சவால்களைச் சாமர்த்தியமாய் சாதனையாக்கித்
தரிசிக்கும் திறன் கொண்டு செயற்பட்டால்
சரிந்துவிழும் நிலைமாறிச் சலித்தமனம் துணிவுபெறும்.
சந்திக்கும் துயரகற்றி தளராத உறுதிபெறும்.

புள்ளிமயில் வாகனன்மனம் அள்ளிப்பறித்த மயில்.
வேலேந்தும் வேலவனை விழிவீச்சால் வென்றகுயில்.
வள்ளியம்மையார் இந்த வள்ளியம்மையார் என்றே
அள்ளிவந்து பதிலுரைத்தால் அதுஇங்கே பொருந்தாது

விண்ணுலகத் தெய்வமல்ல மண்ணுலக மனிதப்பிறவி.
தென்னாபிரிக்கா உதித்த பெண்ணுலகப் புதுப்பிறவி
ஒத்துழையாமை இயக்கம் ஓங்கியே வெற்றிபெற
சித்தமாய் தானுழைத்தே தேடினார் தனிப்பெருமை.

காந்திஜிக்கும் கருத்துணர்த்தி கண்டபயன் அதுஅருமை
இந்திய மக்களுக்கு  இழைக்கப்பட்ட அநீதி கண்டு
இறைமைதனைப் பெற்றெடுக்க பொங்கியே சினந்தெழுந்தார்.
உரிமைக்காய் குரல்கொடுத்துப் போராடிச் சிறையும்சென்றார்.

பதினாறாம் பிறந்தநாளில் பரிதாபம் உயிர்துறந்தார்.
பிறந்த தினமும் மறைந்ததினமும் மாசி இருபத்திஇரண்டு
தன் தமிழினம் விடிவுபெற தளராதுழைத்த விடிவெள்ளி
பெண்ணினத்தை விழிக்க வைத்த பெரும் வலுவாய்

கண்ணியமிக்க கடமையின் கலக்கமற்ற எடுத்துக்காட்டு.
தன்இனம் வாழ தனையீன்ற தனிவீரத்தின் வெற்றிக்கொடி
தலைக்குனிவைப் போக்கிடவே தார்மீக புதுவழிதேடி
பதினாறு அகவையிலே பரம்பரையின் தலைவிதி மாற்ற

மதிகொண்டு போராடி மாதர்குலச் சுதந்திர ஒளிச்சுடராகி
பெண்ணினத்தின் பெரும்பேறென காந்திஜியின் மதிப்பும் பெற்று
பள்ளியெழுச்சிப் பாடி பெண்ணியத்தைத் தட்டியெழுப்பி
முதல் வீராங்கனையாய் முனைப்புடன் புறப்பட்டுப் போராடி

துள்ளிவந்த உணர்வாலே தன்னுயிரைத் தியாகம் செய்த
வள்ளியம்மையார் இவரே அந்த வள்ளியம்மையார்.